Vrindavan Guruvayur Temple Uttar Pradesh

Play Video

Vrindavan guruvayur

Previous slide

Next slide

നമസ്‍കാരം!

മോഹൻജി ഫൗണ്ടേഷന്റെ ആഭിമുഖ്യത്തിൽ, ഉത്തർ പ്രദേശിലെ വൃന്ദാവനത്തിൽ, ഗുരുവായൂരപ്പന്റെ ക്ഷേതമുയരുന്നു! ഗുരുവായൂരിലെ ക്ഷേത്രത്തിനു സമാനമായ ഒരു രൂപരേഖയിലാണ് ഇതു നിർമ്മിക്കപ്പെടുന്നത്. ഗുരുവായൂർ ഉണ്ണിക്കണ്ണന്റെ ദിവ്യചൈതന്യം, അദ്ദേഹം കളിച്ചു വളർന്ന ബ്രജഭൂമിയിൽ അതിന്റെ തനതായ രൂപത്തിനു സമാനമായി അനുഭവിക്കാൻ ഈ ഉദ്യമം വഴിയൊരുക്കുന്നു.

ദേശീയർക്കും വിദേശീയർക്കും എന്നല്ല, കൃഷ്ണഭക്തിയുള്ള ഏതൊരു വ്യക്തിക്കും ഇവിടെ പ്രവേശിച്ചു ഭഗവാനെ ദർശിക്കാനുള്ള സൗകര്യം ഒരുക്കുന്നതാണ്. ഇതൊഴിച്ചാൽ മറ്റെല്ലാ ചിട്ടകളും പൂജാവിധികളും ഗുരുവായൂർ ക്ഷേത്രത്തിലേതിനു സമാനമായിട്ടാണ് ഇവിടെ തുടരുക.

ഈ ആത്മീയ സങ്കേതത്തിനു ജന്മം കൊടുക്കാൻ നിങ്ങൾ ഓരോരുത്തരുടെയും പിന്തുണയും കൂട്ടായ പ്രവർത്തനവും അത്യന്താപേക്ഷിതമാണ്. ഇന്നത്തെ തലമുറയ്ക്കു മാത്രമല്ല, വരും തലമുറകൾക്കെല്ലാം ഭഗവാന്റെ ഇവിടത്തെ സാന്നിദ്ധ്യവും ചൈതന്യവും ആത്മീയ പുരോഗതിയിലേക്കുള്ള ഒരു ദീപസ്തംഭമായി നിലകൊള്ളും.

കേരളീയ ശുദ്ധതന്ത്രവും വാസ്തുവിദ്യയും അനുശാസിക്കുന്ന രീതിയിലാണ് ക്ഷേത്രത്തിന്റെ നിർമ്മാണപദ്ധതി രൂപപ്പെടുത്തിയിരിക്കുന്നത്. ഭക്തരുടെ ഭൗതീകവും ആത്മീയവുമായ ഉന്നതിക്ക് ഉതകുന്നതായ രീതിയിൽ, പഞ്ചപ്രാകാരങ്ങളും ഷഡാധാരങ്ങളും ഉൾപ്പെടുന്ന ഒരു മഹാക്ഷേത്രമാണ് ഇവിടെ ഉയരുക.

ഒരു ക്ഷേത്രത്തിലെ ഗർഭഗൃഹത്തിലുള്ള ദേവപ്രതിഷ്ഠയെ കേന്ദ്രീകൃതമായി, അഞ്ചു വലയങ്ങളായി സ്ഥിതിചെയ്യുന്ന കെട്ടിടസമുച്ചയമാണ് പഞ്ചപ്രാകാരം എന്നു പൊതുവെ പറയുന്നത്. ക്ഷേത്രത്തിലെ പ്രദക്ഷിണ പാതകളും ഇതിൽ ഉൾക്കൊള്ളും. പ്രതിഷ്ഠയുടെ വലിപ്പത്തിന്റെ കണക്കനുസരിച്ചാണ് ക്ഷേത്രസമുച്ചയത്തിന്റെ ഘടനയും കണക്കും നിശ്ചയിക്കുക. ഒരു മനുഷ്യ ശരീരത്തിലെ ഊർജ്ജം ഷഡ് ചക്രങ്ങളെ ആധാരമാക്കി നിലകൊള്ളുന്നപോലെ, ആറു തലങ്ങളിലായി ഊർജ്ജകേന്ദ്രങ്ങൾ സ്ഥാപിച്ചുള്ള പ്രതിഷ്ഠാക്രമമാണ് ക്ഷേത്രത്തിൽ പിന്തുടരുക. ക്ഷേത്രസമുച്ചയം പഞ്ചകോശങ്ങളും ഷഡ് ചക്രങ്ങളുമുള്ള ദേവന്റെ ശരീരത്തെയാണ് പ്രതിനിധാനം ചെയ്യുന്നത്.

കലിയുഗത്തിന്റെ ആരംഭത്തിൽ വ്രജഭൂമിയിൽ നിന്നും കേരളത്തിലേക്ക് എത്തിച്ചേർന്നു എന്നു വിശ്വസിക്കപ്പെടുന്ന ഗുരുവായൂരപ്പ വിഗ്രഹത്തിന്റെ ചൈതന്യം, തിരിച്ചു വൃന്ദാവനത്തിലേക്ക് വന്നുചേരുകയാണ് ഈ ക്ഷേത്രത്തിലൂടെ സാധിതമാവുന്നത്. പൂർണ്ണത്തിൽ നിന്നും പൂർണ്ണമുണ്ടാവുമ്പോൾ പൂർണ്ണമവശേഷിക്കുന്നു എന്ന ഉപനിഷദ് വാക്യം അന്വർത്ഥമാവും പോലെ, ഒരു കാലചംക്രമണം പൂർത്തിയാക്കി, ആ ഭഗവൽചൈതന്യം നിലകൊള്ളുന്നു.

ഭക്തി മാർഗ്ഗമോ, ജ്ഞാന മാർഗ്ഗമോ, കർമ്മ മാർഗ്ഗമോ, ക്രിയാ മാർഗ്ഗമോ, ആത്മീയോന്നതിയിലേക്കുള്ള ഏതൊരു പാതയിലൂടെ സഞ്ചരിക്കുന്നവർക്കും പരമമായ മുക്തിയിലേക്കെത്താനുള്ള ഒരു പടിയായി ഈ കൃഷ്ണസങ്കേതം ഉയർന്നു വരണമെന്നാണ് ക്ഷേത്രയജമാനസ്ഥാനം വഹിക്കുന്ന ബ്രഹ്മശ്രീ മോഹൻജിയുടെ സങ്കൽപ്പം.

അശരണരായ അനവധി വൃദ്ധസ്ത്രീകൾ വൃന്ദാവനത്തിൽ ഇപ്പോഴും അലയുന്നുണ്ട്. ഇതിൽ സ്വമേധയാ വന്നവർ മാത്രമല്ല, കുടുംബാംഗങ്ങളോടൊപ്പം വന്നെത്തി, അവിടെ ഉപേക്ഷിക്കപ്പെട്ടവരുമുണ്ട്. ഇവരിൽ പലരും രോഗാതുരരും ആതുര ശുശ്രൂഷ പ്രത്യേകം വേണ്ടവരുമാണ്. ഇത്തരത്തിലുള്ള ഏകദേശം നൂറു സ്ത്രീകൾക്ക്, സൗജന്യ ഭക്ഷണവും, താമസവും, സ്നേഹത്തോടെയുള്ള പരിചരണവും, ചികിത്സ വേണ്ടുന്നവർക്ക് അതും സൗകര്യപ്പെടുത്തിക്കണ്ടുള്ളൊരു അഭയകേന്ദ്രം, ക്ഷേത്രസമുച്ചയത്തിന്റെ ഭാഗമായി നിർമ്മിക്കാനും തീരുമാനിച്ചിട്ടുണ്ട്. ഇതിനു പുറമെ ഒരു ഗോശാലയും, ഭക്തർക്കു നിത്യ അന്നദാനത്തിനുള്ള സൗകര്യവും അവിടെയൊരുക്കും.

സ്പോൺസർ ചെയ്യാനുള്ള അവസരം

നിങ്ങളുടെ താല്പര്യത്തിനും ത്രാണിക്കുമനുസരിച്ചു സാധിക്കുന്നപോലെ ഈ ക്ഷേത്രനിർമ്മാണത്തിൽ പങ്കുകൊള്ളാം. താഴെയുള്ള ലിങ്ക് മുഖാന്തരം ഇഷ്ടികയോ, മരമോ, ഭഗവാന് ഒന്നോ അതിലധികമോ അടി മണ്ണും ദാനം ചെയ്യാം.

വാക്കു കൊണ്ടോ, മനസ്സു കൊണ്ടോ, പ്രവർത്തി കൊണ്ടോ, ധനം കൊണ്ടോ ഒരു ക്ഷേത്രനിർമ്മാണത്തിൽ ഭക്തി-പുരസ്സരം പങ്കുചേരുന്ന ഓരോ വ്യക്തിക്കും, അവരുടെ കുടുംബങ്ങൾക്കും അതിന്റെ സദ്‌ഫലം ലഭിക്കുമെന്നത് നിശ്ചയമാണ്.

കൂടുതൽ വിവരങ്ങൾക്ക് താഴെ കൊടുത്തിരിക്കുന്ന ലിങ്കുകൾ ഉപയോഗിക്കുക. vguruvayur@mohanji.org

വിഷ്ണു പുരാണം, അഗ്നി പുരാണം, സ്കന്ദ പുരാണം, ബ്രിഹദാരണ്യക ഉപനിഷത്ത് തുടങ്ങിയ പല ഗ്രൻഥങ്ങളിലും ക്ഷേത്രനിർമ്മാണത്തിൽ പങ്കുചേരുന്നതിന്റെ പ്രാധാന്യവും, വരും തലമുറകളുടെ ആത്മീയ ഉന്നതിയെ അതു പോഷിപ്പിക്കാൻ ഉതകുന്നതുകൊണ്ടുള്ള പുണ്യത്തെയും കുറിച്ചു സൂചിപ്പിക്കുന്നു. ഗുരുവായൂരപ്പനുമായി നിങ്ങളുടെ സ്വന്തം ഭക്തിബന്ധം സുദൃഢമാക്കാനും, അതു മറ്റുള്ളവർക്കും സാധിതമാക്കാനുമുള്ള അമൂല്യമായ ഒരവസരമാണ് ഈ സംരഭം നമുക്ക് ഒരുക്കിത്തന്നിരിക്കുന്നത്. പൊന്നു ഗുരുവായൂരപ്പന്റെ ചൈതന്യത്തിന്റെയും സാമീപ്യത്തിന്റെയും സാന്ദ്രാനന്ദം ലോകത്തിൽ ഇനിയും വ്യാപിപ്പിക്കാം. വരൂ, ഇതിൽ നിങ്ങൾക്കും പങ്കു ചേരാം!

By establishing temples and organizing worship, one creates an abode of the divine on Earth, where all can experience the presence and grace of the divine.

Temples are not mere structures of stone and mortar; they are gateways to divinity, where hearts are uplifted, and souls find solace.

Whoever builds a temple for the divine constructs a bridge between heaven and Earth, enabling all beings to commune with the divine and attain spiritual liberation